Үҙебеҙҙәге мәктәптә белем алдым, уның йәмәғәт тормошонда әүҙем ҡатнаштым. Ҙур теләк менән бейеү, вокал, баскетбол түңәрәктәренә йөрөнөм. Район, республика күләмендәге конкурс-олимпиадаларҙа көс һынай торғайным. 10-сы класта уҡығанда башҡорт теле һәм әҙәбиәте буйынса төбәк-ара олимпиадала призлы урын яуланым, ә 11-се класта БР Мәғарифты үҫтереү институтының махсус бүләгенә лайыҡ булдым.
Кескәй саҡтан шиғырҙар уҡырға, уларҙы тасуири һөйләргә яратам. 11-сене тамамлағас, телебеҙгә булған һөйөүем Башҡорт дәүләт университетының Бөрө филиалына алып килде. Бөгөн мин филология һәм мәҙәниәт-ара коммуникациялар факультетының 1-се курс студентымын.
Алға ҡуйған маҡсатым – үҙ илемде, телемде яҡлаусы-һаҡлаусы шәхес булыу, ошо сифаттарҙы киләсәк быуында ла тәрбиәләү. Маҡсатыма ирешермен, тигән өмөттәмен, сөнки янымда төплө белем биреүсе, ярҙам ҡулы һуҙырға әҙер торған уҡытыусыларым бар.