Хәйбулла ирекмәндәре яугирҙарыбыҙға даими ярҙам итә

– Махсус хәрби операция би­лә­мәһендәге яугирҙар өсөн ха­лыҡтан адреслы ярҙам йыйып оҙатабыҙ: йыйылған аҡсаға ҡиммәтле приборҙар, тепловизор, детектор, дизель йылытыу ҡоролмалары, эш ҡорамалдары алабыҙ, һаҡланыу селтәрҙәре үрәбеҙ, көрәктәр һаплап ебә­рәбеҙ. Был эштә Йәнтеш, Ғәлиәхмәт, Ивановка ауылдары «Ир-егеттәр ҡоро» айырыуса ныҡ ярҙам итә: шпагаттан арҡан ишәләр, окоп шәмдәре, балта һабы, дронға ҡаршы 200-ҙән ашыу  япма әҙерләгән. Маҡан, Мәмбәт, Ергән, Федоровка ауылдарының уңған ҡатын-ҡыҙҙары, оҫталар йылы кейем, футболка, балаклава, эске кейем тегә, – тип һөйләне улар.
Шулай уҡ ирекмәндәр мунса, тимер мейес, миндек, хатта мунсаға Һаҡмар ташын да әҙерләй. 
Юлиә Ғәлиева һәм уның ире Илдар Минһажев бындай яр­ҙамды ай һайын ебәрә, үҙҙәре Ульяновск ҡалаһына барып ҡайтҡан. Медицина кәрәк-ярағын Донецк, Луганск, Белгород, Курск, Херсон яҡтарына оҙаталар. «Бәйләнеш»тәге төркөмдә һәр  саҡ отчет биреп баралар. Шулай уҡ урындағы эшҡыуарҙар ҙа төрлө ярҙам күрһәтә. 
Бына шундай эш-мәшәҡәт менән янып йөрөгән «Тыуған тыл – Хәйбулла» ирекмәндәр төркөмө етәксеһе Юлиә Ғәлиева һәм уның ире Илдар Минһажев, йыйылған 200 мең һум аҡсаға кәрәк-яраҡ алыу маҡсатында, артабан юл тоттолар.
«Йәшлек» гәзите редакцияһы иһә был гуманитар ярҙам ылауын, үҙҙәренән дә өҫтәп, яугирҙарыбыҙға оҙатыу хәстәрен күрер.
    
 Һәҙиә Урманова.
Юлай КӘРИМОВ фотолары.