«Гәзиттә әхлаҡи темалар яҡтыртылыуы оҡшай»

Бынан алда яҙылыусыларыбыҙҙы шатландырып, ҡиммәтле приздарҙы үҙебеҙ таратыуыбыҙ хаҡында яҙғайныҡ.

Тәүге еңеүсебеҙ – Әбйәлил районының Иҫке Балапан ауылынан Урал Сөләймәнов. «Йәшлек»те йәш сағынан алдырған, башҡорт матбуғатына битараф булмаған ағай манты бешергес менән бүләкләнде. Абруйлы ир-уҙаман, БР-ҙың атҡаҙанған энергетигы Урал Сөләймәновтың гәзитебеҙ тураһындағы йылы һүҙҙәре күңелгә май булып яғылды:

– Ғөмүмән, башҡорт баҫмаларын алдырмай ҡалғаным юҡ. «Йәшлек» менән уның «Ленинсы» булған ваҡытынан алып дуҫмын. Гәзиттә айырыуса әхлаҡи темалар яҡтыртылыуы оҡшай, ғаиләне һаҡлап ҡалыу, уңышлы донъя көтөү – быларҙың барыһы ла мөһим бит. Һуңынан яңылыҡтарҙы, алдынғы ҡарашлы кешеләр хаҡындағы мәҡәләләрҙе уҡыйым. Шәп гәзитте уҡыныҡ, уҡыйбыҙ, уҡыясаҡбыҙ!