Крәҫтиәндәр ярҙамһыҙ ҡалмаясаҡ

Башҡортостанда теләге булған ауыл хужалығы ойошмаларына ерҙе залогҡа һалып кредит алыуҙа ярҙам күрһәтеләсәк. Был эш пилот проекты сиктәрендә алып барыла. ҡариҙел районында үткән ауыл хужалығы тауар­ҙары етештереүселәрҙе кредитлау мәсьәләләре буйынса төбәк семинары йомғаҡтары нигеҙендә шундай ҡарар ҡабул ителгән.
Сарала ауыл хужалығы ойошмалары етәкселәре, крәҫтиән-фермер хужалыҡтары башлыҡтары, Ер һәм мөлкәт мөнәсәбәттәре, Ауыл хужалығы министрлыҡтары вәкилдәре, шулай уҡ республиканың төньяҡ-көнсығыш райондары белгестәре ҡатнашҡан.
Семинарҙа ҡатнашыусылар БР Милли банкы һәм «Россельхозбанк»тың Башҡортостан төбәк филиалының заем алыусыларҙы кредитлау һәм бәләкәй хужалыҡ формаларына дәүләт ярҙамы күрһәтеү буйынса тәҡдимдәре менән таныш­ҡан.
Әйткәндәй, эшкәртеү сәнәғәте предприятиелары яҙғы сәсеү алдынан республика аграрийҙарына әүҙем ярҙам итә. Мәҫәлән, «Мәләүез һөт-консерва комбинаты» ябыҡ акционерҙар йәмғиәте яҙғы баҫыу эштәрен аванслауға 100 млн һумға яҡын аҡса йүнәлтергә ниәтләй. Предприятиеның Кушнаренко, Стәрлебаш, Мәләүез, Федоровка, Кө­йөргәҙе, Күгәрсен, Әбйәлил, Ейәнсура, Баймаҡ, Йылайыр райондарында халыҡтан һөт йыйыуҙы ойоштороу өл­кәһендә берлектә әүҙем эшләү буйынса ыңғай тәжрибәһе бар.